top of page
Search

U IMMANUEL: KA KYRWOH NA BYMJUKUT


- Alpha Hercules Sawkmie


Ha ka gospel katkum u Mathaïos la pynskhem ïa ka jingkha ïa U Jisu kumba la ïathuhlypa da u nongïathuhlypa Isaïah uba ong: “Namar kata, U Trai hi un ai ka dak ïa phi: Ha khmih, ka theisotti kan punkhun, kan kha ruh ïa u khun, yn khot ruh ïa ka kyrteng jong u, ‘u Immanuel’” (Isaïah 7:14).


Ha ka ktien tynrai ha ka Hebrew, ïa ka kyntien ‘Immanuel’ la pynlong na ki artylli ki kyntien, kata: Immanu kaba mut ‘bad ngi’ (with us) bad El kaba mut ‘U Blei’ (God). Ha kiwei pat ki jingbatai, El ka mut ruh ‘U Badonbor baroh’. Kumta haba shim kyllum ïa ka jingmut jong ka kyntien Immanuel, ka thew ïa ka jingwan ban don bad ngi jong U Blei Badonbor baroh; kaba u Mathaïos ruh u ai ïa ka jingbatai kaba kit ïa kajuh ka jingmut, kata: ‘U Blei lem bad ngi’ (Mathaïos1:23).

Ka jingkular jong U Blei ban don ryngkat bad la ki briew kam dei kaba U kren tang lyngba u nongïathuhlypa Isaïah, hynrei ka dei kaba U la kren ruh naduh ka kitab Lebitikos haba U ong ïa kine ki kyntien: “Hynrei, ngan ïaid hapdeng jong phi, bad ngan long U Blei jong phi, bad phi ruh phin long u paidlang jong nga” (26:12).


U Blei U pynbna ruh ïa kata ka jingthmu bymjukut jong U ban long ryngkat bad la ki briew lyngba u nongïathuhlypa Sekharaïah ha kine ki kyntien: “10To rwai bad to leh kmen, ko khun ka Seïon: naba, ha khmih, nga wan, bad ngan shong hapdeng jong pha,” ong U Trai. 11Bad bun ki jaid bynriew kin pynïasoh ïa lade ha U Trai ha kata ka sngi, bad kin long ki briew jong nga: bad ngan shong hapdeng jong pha, bad phan ïoh tip ba U Trai ki paid u la phah ïa nga ha pha” (2:10-11).


Ki long ki jingkular kiba phylla kiba U Blei U la pynkhreh naduh bymjukut ban don lem ryngkat bad la ki briew. Kane ka pynpaw shai kdar ïa ka jinglong bakordor jong u briew kum u jingthaw bakyrpang jong U Blei. U briew u la duh lehnohei noh ïa ka burom U Blei baroh hadien ba u la hab noh na kata ka kper kaba la buh nyngkong ïa u, hynrei kata ka Jingieid kaba maïan, kaba jylliew bad ka bym lah ban batai da u briew, la pynpaw da U Jisu Khrist haba U la wan ha ka doh, ha ka jinglong barit eh ban don lem bad ngi ki briew kiba ka pop tynrai ka la teh mraw. U la wan ba ngin ïoh ka jingim kaba thymmai bad ka jingim kaba kyrhai haba ngi ngeit bad pdiang ïa U kum U Nongpynim jong ngi.


Ka khubor jong ka jingdon jong U hapdeng jong ngi ka long ka kyrwoh ka bym kylla shuh kaba la pynkhreh na bymjukut, kaba ki bangeit kin ïai kynmaw ha man ba ki rakhe ïa ka Khristmas. Ka jingkylli kaba mih hangne ka long: Hato U ïoh jaka mo hapoh jong ngi, ha ka jingim jong ngi kaba man la ka sngi ne tang shisien shisnem ha kum kane aïom?


Ka Khristmas kaba suk, kaba kmen bad u snem thymmai uba dap jingkyrkhu un long ïa phi baroh. Amen.


I

Bah Alpha H. Sawkmie i dei u samla rangbah ka Balang Presbyterian Jaiaw bad i dei ruh u dkhot ka Editorial Board (Ex-Chief Editor), Lam Jingshai E-Newsletter. I dang long ruh u Vice-Chairman ka Jingiaseng Samla bad u nonghikai ka Intermediate Department, Sunday School. I trei kum uwei na ki nonghikai ha Union Christian College, Umiam khwan, Ri-Bhoi district bad I shong I sah ha Jaïaw Langsning, Shillong - 793002.



10 views0 comments

Recent Posts

See All

Ka Aïom Khristmas barabor ka pyndap ïa ka dohnud jong kiba bun da ka jingkmen bad da ki jingrwai ban pynbna shaphang U Nongpynim, Uba long ka jingai bakordor tam bad bamaïan tam jong U Blei ïa ka pyrt

bottom of page