top of page
Search

"NANGTA U WAN U JISU"

Eddie P. Kharbhih


"Namar ki jingkular U Blei katba don, ki long ha u kaba hooid, bad ha u kaba amen, ia kaban pyndon burom ia U Blei da ngi" (2 Korinth 1:20).


Shuwa ban thaw ia ka pyrthei, U Blei U la pyrkhat lypa kumno ba Un pynlong ka jingiadei bad u briew. Ka Proberb 8 ka kdew ia kane ruh. U Blei U Kpa, bad U Blei U Khun,ki la ia mutdur baroh kiei kiei ki ban sa jia ha ka histori u briew bad ki la nang ia pynkhreh ka lynti ha kaba u briew uba ehrang bad ba saitlah ba kumno un ioh ban wan phai biang sha U. Hooid, ki lad ia U Blei ki bun, bad baroh ha kaba kut hi ki poi sha ka jingaiti lut ka jong U Khun U Blei, U Jisu Khrist, kaba U Blei U pdiang hun.


Na pdeng ki lad kiba U Blei U la pyrkhat sani bha ka dei: 'Ka Lynti ka Jingkular'. Ka jingkular ka long ka nongrim ha kaba U Blei U ia jan bha ka jingiadei bad u briew. Ka dei ka jingkular kaba la buh ia ka nongrim ka Jutang Blei. Ka dei haki jingkular ruh ha kaba la pynshong nongrim ia ki jingiathuhlypa baroh ha kaba ka jinglong tynrai ba shisha bad ba shai jong ka niam Khristan, kaba la shan pateng la pateng da ki hajar snem, bad ha kaba la sain dur bad pynjanai da U Blei hi da ka Ktien jong U: Ka Bible.


U Blei U la buh ia ka jingkular kum ka guarantee ba kumno ki briew baroh kin ia seng ia ka jingia dei ha pdeng para bynriew. Ba kan don ka jingiaburom ia ka kular bad ka ktien ha ka nongrim ka jinglong kaba hok bad ba shida. Bad khatduh eh ki jingkular ki lam sha ka kuna haba la pynkhein ia ki.


Hynrei, U Blei haba U kular U bat ia ka jingkular bad Um donkam satia ban don ka kuna ia U "namarki jingkular U Blei katbadon, ki long ha u kaba hooid,bad ha u kaba amen". U Blei haba U kular u smai ruh da lade hi namar ym don shu uba kham khraw ban ia U. U long U Blei U bym jukylla ka jinglong kum ki briew.Uba iaineh ka jingbha na bymjukut sha bymjukut. Uba pynthymmai ka jingisynei man la ka step (Jingrwai Sngewsynei 3:23).


Te namar kata ka daw U Blei U tyrwa ki jingkular khnang ba u khun bynriew un tip bad ithuh ia U bad ban bud bad bat ia ki jingkular ki jong U.


Ia u Abraham "un kyrkhu bad pynlong na u ka jaitbynriew kaba khraw" (Jenesis12:1-3), u Moses un pynlaitluid bad ialam ia ki khun Israel, ia u Joshua un jop ki thma ba shyrkhei sha lynti ka ri ka jingkular, ia u Dabid ba un shynshar, ia u Solomon ba un tei, bad lada ka jaitbynriew ba la jied U Blei ka kylla kaba mut, kumba la pynpaw ki nongiathuhlypa kiba bun, U Blei Un dang iai pyndep ia baroh ki jingkular. U dang ap bad ailad ia baroh ban phai noh sha U. Ym kwah ba kawei ruh ka mynsiem kan jot noh.


Nangta U wan U Jisu. Dei ma U Ka Jingkular bad U Nongkular. La pynlong doh pynlong snam ia ki jingkular baroh ki jong U Blei, la pyndeppynurlong ia ki bad nalor nangta ruh U Trai Jisu U dang bteng shuh shuh ki jingkular ba im bad ba shisha. Ngan sa wan biang bad to long ba la pynkhreh.


U Blei U kwah hir hir ia u briew ba un ngeit bad shaniah ha ki jingkular jong U, ban tip ruh ia ka jinglongBlei ka jong U bad ban iaid ha ka lynti ka jingpyndonburom tang iaU ha baroh ki bynta ka jingim u briew. Da kaba pdiang ia ki jingkular ki jong U, u briewu pyndonburom ia U Blei bad plie ka lad ban pdiang ki jingkyrkhu ki jong U Blei da U Khrist Jisu. Dei namar kane ka daw ba ka Testament kaba Thymmai ka ong ba baroh kiba ngeit ki ioh diang baroh ki jingkyrkhu ha ka jingim bariewblei tang lyngba"ki jingkular ba kordor tam"ki jong U Blei ha ka kyrtengba khraw tam ka jong U Trai Jisu. "Badngi kwah ba uwei pa uwei na phi un pyni ia kajuh ka jingminot sha ka jingdap ka jingkyrmen haduh kaba kut kein, ba phin ym long kiba alhia, hynrei ki nongpyrthuh ia kita kiba da ka jingngeit bad ka jingiaishah ki iaioh ia ki jingkular" (Sha Ki Hebru 6:11-12).


U Blei na ka bynta ka burom ka jong U - AMEN.


I

Bah Eddie P.Kharbhih i dei i dkhot ka Balang Presbyterian Jaiaw. I dei ruh iwei na ki ba ia kit ia bah ia ka kam U Blei lyngba ka Jingiaseng Dong Jaiaw Langsning. Bad shuh shuh i dei ruh uwei na ki nonghikai Sunday School ha Intermediate Department, bad i dei ruh uwei na ki nongthoh ba ju noh synniang ha ki jingpuson lyngkot ia ka Ktien U Blei (Devotion) ha ka E – Newsletter ka Jingiaseng Samla Balang Presbuopyterian Jaiaw.

11 views0 comments

Recent Posts

See All

Ka Aïom Khristmas barabor ka pyndap ïa ka dohnud jong kiba bun da ka jingkmen bad da ki jingrwai ban pynbna shaphang U Nongpynim, Uba long ka jingai bakordor tam bad bamaïan tam jong U Blei ïa ka pyrt

bottom of page