top of page
Search

KA JINGAISNGEWBHA KABA SHISHA (TRUE GIFT)

-Shlur Manik Syiem

Ka jingaisngewbha kaba shisha kadei kaei kaei kaei kaba, ha ka jingshisha, ka long kaba kordor katta katta ha uta uba ai bad ka long ruh kaba phylla bad kaba maïan ha uta uba pdiang ia ka. Lada ka jingaisngewbha ka dei kaba ai tang na ka daw ba dei ban ai, u nongai u ai la ka ai khlem da sngewthuh bha ia ka dor bad jingthmujong ka bad uba pdiangruh u pdiang la ka pdiang khlem da don jingpyrkhat ba un pyndonkam kumno bad haei ia kata ka jingaisngewbha. Ka Jingaisngewbha kaba shisha (True Gift) ka dei kaba don ka jingïadei kaba jan bad uta u nongai bad kaba don pat ruh ka jingktah ia uta uba pdiang ia ka. Kumta, haba ka don ka jingai sngewbha kaba shisha, kata ka jingaisngewbha ka ktah ia ka jingiadeijong uba ai bad uba pdiang ha kaba ka wanrah ia ka jingiadei kaba jan bad kaba iabyrshem jylliew (close and intimate relationship) hapdeng jong ki baroh arngut.

Ka aiom Khristmas ka long ka aiom jong ki jingaisngewbha. Haba ngi rakhe ia ka Khristmas, ngi rakhe ia ka ryngkat bad ki jingaisngewbha kiba ngi ai sha kiba ieit kiba thoiñ, ki lok ki jor bad kham kyrpang ruh ia ki para mynsiem kiba don hapdeng ka jingiaksaid jong ka jingim namar ki jingduk jingkyrduh. Haba leh kumta kam long kaba bakla namar haba ngi leh kumta ngi pynpaw ia ka mynsiem jong ka jingieitjong ngi ia ki. Haba ngi leh ia kita kiei kiei ngim dei ban klet ia kawei ka jingshisha ba ka Khristmas ka long kaba donkam bha ruh ha ka jingim kaba shimet ka jong ngi. Lada ngi klet ia kane, ki jingaisngewbha kiba ngi ai sha kiwei pat, kumba la kdew, kin duh noh ia ka jingmut bashisha jong ki.

Ha ine i jingthoh ngin iapeit ia ka Jingaisngewbha bashisha (True Gift) jong U Blei ia u khun bynriew. Hakaneka jingaisngewbha jong U Blei ia u briew,ka don ka jingai kaba U Blei U ai ia kata kaba kordor tam jong ka bneng bad kata ka dei ka Jingaisngewbha kaba da la U jong U Khun ba la kha marwei jong u U Jisu Khrist ban pynim ei ia u khunbynriew ba la iap ha ka pop.

Kaba nyngkong, haba U Blei U ai ïa la U Khun jong U U Jisu Khrist ban long ka jingaisngewbha (Gift) ia u khunbynriew, kata ka dei ka jingai kaba shaphang ka Jingtip ia ka Jingshisha (The gift of the knowledge of Truth). Ka daw kaba nyngkong jong ka jinghapnoh jong u khunbynriew ha ka pop ka long namar ka jingpynbakla jong u ia ka jingshisha bad kata ka jingshisha ka long ka Ktien ka jong U Blei. Ha Eden, U Blei U la buh kawei ka hukum bad kata ka long: “Na u dieng baroh ha ka kper,da kaba bam me lah ban bam ei; hynreina u dieng ka jingtip ia kaba bha bad ia kaba sniew men ym ioh bam na u: naba ha kata ka sngi ba me bam na u da kaba iap men iap shisha” (Jen.2:16-17). Hynrei ka Im pat ka pynkylla (bad pynbakla ruh) ia kata ka hukum, kaba long ka Ktien jong U Blei, da kaba ong ia u Soitan ba “Na u soh ki diengha ka kper ngi ioh ban bam: hynrei na u soh jong u dieng uba hapdeng ka kper, U Blei u la ong, Phin ym ioh bam na u, lymne ktah ia u, ba ioh phin iap noh” (Jen.3:3). U Blei U ong ba lada bam na u dieng jong ka jingtip ia kaba bha bad ba sniew, “da kaba iap men iap shisha”, hynrei ka Im pat ka ong ba U Blei u ong “ioh phin iap noh. Phi iohi, hangneka don ka jingpynbakla ia ka Jingshisha! Haba pynbakla noh ia ka Jingshisha u briew u iap bad u khunbynriew ruh baroh shityllup ka pyrthei.

Hynrei U Blei U la phah pat ia U Khun jong U U Jisu Khristuba la don ha kaba nyngkong bad U Blei namar U long hi U Blei (Ioan.1:1) bad uba “Da u la long kiei kiei baroh;bad khlem ma U ym shym la long kaei kaei ruh kaba la long” (Ioan.1:2) ban long ka Jingaisngewbha kaba shaphang ka jingtip ia ka Jingshisha. Te kaei ka Jingshisha? U Jisu haba U duwai ha la U Kpa na kabynta la ki synran hashuwaba un pyndep ia ka jingkñia ban siewspah ia u briewna ki pop halor jong ka diengphna u ong kumne: “To pynkyntang ia ki da ka Jingshisha; ka ktien (logos)jong me ka long ka jingshisha” (Ioan.17:17).

U Blei U la ai ha ngi ia “U Ktien” (Logos) – U Khun jong U, uba long ka Jingshisha (Ioan.14:6) ba un “kynja doh” bad ym tang katta hynrei ban “shong sah hapdeng jong ngi” (Ioan.1:14). Haba U Jisu, uta “U Ktien”, U don hapdengjong ngi, U long ka jingai sngewbhajong U Blei ia ngi, kaba donkam ka long ba ngin pdiang ia U. Haba ngi pdiang ia U,ka mut ba ngi dei ban ngeit lut ia ki ktien ki jong U. Ka Ktien ka jong U Blei kaba ngi khot ka Baibl, ka don ha ka ia “Ka Jingshisha” kaba ngi hap ban ri kyndong ban sumar bad sheptieng buromruh ia ka. U Trai Jisu uba long kata ka Jingaisngewbha jong U Blei, U ong, “Lada phi ieit ia nga to sumar ia ki hukum jong nga” (Ioan.14:15). Baleingi hap ban sumar ia ki? Namar haba sumaria ki hukum kiba long ka Ktien ka jong U Blei kaba long ruh ka Jingshisha kaba tang ma ka hi (Exclusive Truth), don ka jingkular ia ka jingim bymjukut – “Te nga tip ba kata ka hukum jong u ka long ka jingim bymjukut” (Ioan.12:50).

Ha Eden ia ka Ktien jong U Blei la bataithymmai (redefined) da u khun bynriew bad kumta u khun bynriew u la duh noh ia ka burom jong U Blei. Hynrei lyngba U Jisu U la ai biang ia ka jingtip kaba shaphangka Ktien jong U kaba long ka Jingshisha ban long hapdengjong ngi, khnang ba ynda haba ngi pdiang pat ia ka, Un ioh ban shong ha ngi haduh ban ai syndon ha ngi ia ka Jingim bymjukut.

Kaba ar, haba U Blei U ai ïa la U Khun jong U U Jisu Khristban long ka jingaisngewbha (Gift) ia u khunbynriew, kata ka dei ka jingai kaba shaphang ka Jingtip ia ka Jingkmen. Kan ym don kano kano kawei pat ka jingkmennalor ka jingtipia ka jingkular kaba shaphangka jingim bymjukut. U JisuU ong: “Naba U Blei u la ieit katta katta ia ka pyrthei katba u la aiti noh iala U Khun ba la kha marwei, ba uei uei ruh uba ngeit ha u, un ym jot shuh, hynrei un ioh ka jingim bymjukut” (Ioan.3:16). Dei namarkata ka daw haba ki angel ki pynbna ia kata ka khubor jong ka jingaisngewbha jong U Blei ia u khunbynriew ha ki nongaplangbrot ka ri Judia,ki ong: “Ka Burom ha U Blei ha kiba jrong tam eh, bad ha ka pyrthei ka jingsuk hapdengki briew ha kiba u sngewbha eh” (Louk.2:14).

Ha Eden, u khun bynriew u la duh noh ia ka jingtip kaba shaphang ka jingkmen jong ka jingim bymjukut ha ka Hima ka jongU Blei. Hynrei lyngba U JisuKhrist U Blei U la ai pat ha U khunbynriew ia ka jingkular ia ka Jingkmen.Lada ngi la pdiang ia ka jingaisngewbha jong U Blei kaba daU Jisu Khristha ka jingim jong ngi, ka lah ban long ba ngin mad ia ki jingeh ha ka pyrthei, hynrei ngin ym khuslai eiei shuh namar ma U uba long ka Jingshisha, Un ai ka jingjop ha ngi namar u la ong: “ha kata ka pyrthei phin ioh ka jynjar, hynrei to long shlur phi! Nga nga la jop ia kata ka pyrthei” (Ioan.16:33).


Kaba lai, haba U Blei U ai ïa la U Khun jong U U Jisu Khristban long ka jingaisngewbha (Gift) ia u khunbynriew, kata ka dei ka jingai kaba shaphang ka Jingtip ia ka jingim badap kyrhai. Haba ngi pdiang ia U Jisu,uba long ka Jingaisngewbha jong U Blei, U Jisu U kular ha ngi ia ka jingim kaba dap kyrhai- “Nga nga la wan ba kin ioh ka jingim, ba kin ioh kyrhai ia ka ruh” (Ioan.10:10).


Ha Eden, u khun bynriew u la duh noh ia ka jingtip kaba shaphang ka jingim kaba dap kyrhai bad u la hap ban phet rieh noh na U Blei bad khatduhu la hap ban mih noh na ka Kper Eden (Jen.3:23). Ha ngi mynta, lada ngi pdiangia ka jingaisngewbha bashisha jong U Blei ha ka jingim jong ngi, ngi lah ban hap ban iaid lyngba ia ki jingeh kiba khraw katno katnojong ka jingim la ka long ka jingkyrduh, ki jingpang, ki jingkhuslai ba bun rukom, ki jingpynsheptieng bad kiwei pat, hynrei U Jisu uba long ka jingaisngewbha un pyndap, un pynkhiah, un pyntngen bad un ai bor ruh ia ngi namar u ong: “To wan ha nga, phi baroh kiba thait bad bakhia ka jingkit, te ngan pynjem iaphi” (Math.11:28).


Jingpynkut:

Kane ka dei ka jingaisngewbha kaba shisha. Ha kine ki sngi kiba eh kum kine kiba baroh ngi hap ban iaid lyngba ngi donkam ban pdiang da ka jingsngewthuh kaba skhem (sound understanding) ia ka Jingaisngewbha kaba shisha jong U Blei ia ngi da la U jong U Khun. U Blei U ai ia la U Khun namar U don ka jingthmu na ka bynta jong ngi lyngba jong U. Bad ha kane ka pyrthei kaba dap da ka jingkulmar (chaotic world), ka jingaisngewbha kaba shaphang ka jingtip ia ka jingshisha, ka dei ma ka kaba lah ban kyrshan bad ai bor ia ngi ban jop ia ki jingartatien, ki jingma, ki jingsheptieng bad ki jingbymthikna baroh. Ka jingaisngewbha kaba shaphang ka jingtip ia ka jingkmen kaba shisha kan pynlahia ngi ban iengskhem bad kyrmen hapdengki jingialeh kiba khraw jong ka jingim.Bad ka jingaisngewbha kaba shaphangka jingtip ia ka jingimbadap kyrhai, kan pynioh ha ngi ia ki jingiohipaw kiba thymmai bad ki jingkut jingmut kiba thymmai ba ka jingim jong ngi kaba hangne bad mynta ka long ka jingpynkhreh na ka bynta ban ioh im ha ka Hima bah jong U Emmanuel ha ki yrta bah bymjukut ia kaba u nongrwai Salm u ong: “Ia kane kawei nga la kyrpad na U Trai, ia kata ngan iawad; ba ngan ioh shong ha ka ïing U Trai baroh ki sngi ka rta jong nga, ia ka ban khmih ia ka jingitynnad U Trai, bad ban iakylliha ka templ jong u.” (Salm.27:4).




I Bah Shlur M.Syiem i dei u rangbah ka Balang Presbyterian Jaiaw, i dei u nongthoh, u nonghikai bad u nongialap ha la ka Balang bad sha kiwei pat ki jaka ha Ri Khasi Jaintia. I dei ruh u dkhot ka Editorial Board, Lam Jingshai E-Newsletter. I trei ha ka Office of District Statistical Officer, West Jaintia Hills District, Jowai bad i shong ha Langkyrding Mihngi – Block 3, Shillong

9 views0 comments

Recent Posts

See All

Ka Aïom Khristmas barabor ka pyndap ïa ka dohnud jong kiba bun da ka jingkmen bad da ki jingrwai ban pynbna shaphang U Nongpynim, Uba long ka jingai bakordor tam bad bamaïan tam jong U Blei ïa ka pyrt

bottom of page