Search

EDITORIAL

Ki sngi ki por ki la nang ïaid hadien ba kiei-kiei ki i kumba ki la ïaid beit kumba long ha ki snem shuwa ka pandemic, bad ki jingkylla babun rukom ruh ki la nang paw naduh ka jingim briew bad kiei-kiei sawdong jong ngi. Kum ki khun Khristan, ka jingkhmih lynti ka long ba ki bangeit kin nang kham wad ïa U Blei bad beh tista sha ki jingshakri, pynban ka long mar khongpong ïa kata ka jingkhmih lynti namar ka don ka jinghiar ha ka jinglong jingim jong kiba bun ban beh sha ki jingshakri sha ïing U Blei. La ngim tip ïa ki daw kiba thikna kaei kaba pynlong ïa kiba bun ban pynjngai ïalade na ki jingshakri, hynrei to ngin ïai duwai ba U Blei Un ktah ïa ka jingim jong ki bad Un pynthymmai bor ïa ki ban ieid bad bang pat ïa ki jingïasenglang. Ha kajuh ka por ngim dei ban klet ban ainguh ïa U Blei, namar ka Kti Badonbor baroh ka jong U kaba la btin ïa ngi lyngba ki por ka jingkmen bad ka por jong ki jingtynjuh ka dang long ryngkat bad ngi. Ka dei ïa ngi ban ïai snoh beit tang ha U bad ban ym sngewduh jingkyrmen, katba ngi dang dei ban pynleit jingmut ïa kaba shakhmat jong ka lynti ïaid jong ngi. Ka Ktien U Blei ka ong: “…ka lynti u briew kam long ha u hi; kam long ha u briew uba ïaid ban pynbeit ïa la ki jingjam” (Jer. 10:23). To ngin ap kyrmen ha U Blei Uba pynthymmai bor ïa ngi.


“…kita kiba ap khmih ïa U Trai kin pynthymmai bor; kin her sha jrong da ki thapniang kum ki pukni; kin mareh, bad kin ym sngewthait; kin ïaid, bad kin ym sngewlwait.” ISAÏAH 40:31



6 views0 comments

Recent Posts

See All