KA JINGSDANG BAD JINGÏAID LYNTI JONG KA NEWSLETTER LAM JINGSHAI

Editorial Board

    Ka Newsletter Lam Jingshai, jong ka Jingïaseng Samla Balang Presbyterïan Jaïaw, ka la mih nyngkong eh ha u bnai March−April, 2005, kaba long ka Issue banyngkong, ha ka dur jong ka shithi pathai khubor, ïa kaba la tip beit kum ka Newsletter. Ka sien pynmih kaba nyngkong jong ka Newsletter ka da kup shisha ïa ka jingmut bashisha jong ka “JINGSDANG” namar ka kynthup ha ka ïa ka jingmaitphang ïa ki jingthmu baroh kiba ka Jingïaseng Samla ka don ha kaba pynmih ïa ka Newsletter jong ka. Wat la ka dur (format) jong ka sien mih nyngkong jong ka kam da long kaba lah lehse ban da sngewsarong, hynrei ki jingthoh kiba don ha ka ki long kiba don la ka jong ka dor, kiba long ruh ki jinglam lynti ïa kiei kiei baroh kiban wan.

Hynrei naduh ka sien mih kaba ar, ym tang ba la pynmih ïa ka Newsletter ha ka dur (format) kaba kham itynnat, la nang pynbha shuh shuh ïa ki jingthoh katkum ki nongrim ba la pruid dak ha ka sien mih kaba nyngkong. Nangtei bad shakhmat ka Newsletter jong ka Jingïaseng Samla Balang Presbyterïan Jaïaw, ka la nang ïaid shaphrang ha ka jingïalam ka jong U Blei. Ka Jingïaseng Samla lyngba ka Editorïal Board jong ka Newsletter, ka la pyrshang ban pynbha ïa ka jingshakri lyngba ka Newsletter na ka bynta ki para samla kyrpang bad kumjuh ruh na ka bynta ki dkhot jong ka Balang hi. 
    Ha kaba nyngkong ka Newsletter ka la kynthup ha ka ïa ki saw tylli ki page ha kaba ha ki la thep bad pynrung ïa ki jingthoh kiba pher bapher, kiba kynthup naduh ki jingpyni, ki jingkyntu, ki jingkynpham, ki jinghikai bad kumta ter ter. Hynrei dei ha ka Issue kaba lai jong ka Volume 3, jong ki bnai May−June,2007, ba la nang pynïar shuh shuh ïa ka Newsletter ha kaba ha katei ka sienpynmih, la pynkiew ïa ka jingdon jong ki page sha ki phra pages. Ha katei ka sien pynmih la pynmih ruh ïa ka Newsletter ryngkat bad ka kyrteng kaba thymmmai ïa kaba la tip ïa ka haduh mynta da ka “Newsletter Lam Jingshai”. Hashuwa kata la tip ïa ka beit tang “Newsletter”. Ym tang katta, ha katei ka sien pynmih la pynmih ruh ïa ka Newsletter ha kaba ïa ka page kaba nyngkong la shon ha ki rong (multi coloured). Ka jingkyntiew noh ïa ka Newsletter Lam Jingshai na ka saw page sha ka phra page ka long na ka daw jong ka jingnoh synñiang jong ki para samla lyngba ki jingthoh kiba la long shisha ki jingmyntoi ïa ki nongpule. Ka Jingïaseng Samla ka la pyrshang na kawei ka por sha kawei pat ym tang ban pynbha ïa ki jingthoh hynrei wat ban pynitynnat ruh ïa ka dur ka dar jong ka Newsletter Lam Jingshai na ka por sha ka por. Kumta la pynkylla biang bad kham pynitynnat shuh shuh ïa ka dur (format) jong ka Newsletter Lam Jingshai ha ka sien pynmih kaba san jong ka thup (Volume) kaba hynriew, kata ka sien pynmih na ka bynta u bnai September–October, 2010. Kane ruh ka la long ha ki rong (multi coloured), bad dei ha ka sien pynmih kaba  lai jong ka thup kaba khyndai, kata ka sien pynmih na ka bynta u bnai May−June, 2013 ba ka Jingïaseng Samla ka la wanrah sa shisien pat ïa ka jingpynkylla ïa ka dur (format) jong ka Newsletter Lam Jingshai. Ha kane ka sien la pynmih ïa ka Newsletter Lam Jingshai ha ka dur jong ka Kot (Booklet form) kaba kynthup ïa ki arphew Page, bad kane ka sah haduh mynta.
    Ka Jingïaseng Samla lyngba ka Editorial Board ka la pyrshang na kawei ka por sha kawei pat ban ïaleh ha ka ban pynbha ïa ka jinglong (quality) jong ki jingthoh khnang ba ki jingthoh kin ym long kiba ‘SHU’ thoh hynrei kiba ‘DA’ thoh shisha da ka jingïohi ïa ka jingdonkam jong ki khun samla kyrpang bad kumjuh ruh jong ki dkhot jong ka Balang. Kumta ki jingthoh kiba la pynmih ha ka Newsletter Lam Jingshai ki long kiba la buh thong ba kin long kham kyrpang na ka bynta ki para Samla bad kumno ban “sneng, syllok, kyntu kynpham, pyntip, ïalam, btin, kdew, pyni, bad ïarap ba ngin khlaiñ ka pyrkhat pyrdaiñ Khristan”. Ka Jingïaseng Samla ka pyrshang ban kynjoh sha katei ka thong kaba ka la buh na ka bynta ki para Samla kyrpang bad kumjuh ïa baroh ki dkhot jong ka Balang lyngba ki Bible Study, ki Matpyrkhat kiba ïadei bad ki phang bad ki bynta bapher jong ka jingim briew kiba ki samla ki hap ban ïakynduh bad kumjuh ruh ki article ki bapher bapher halor ki bynta kiba pher bapher. 
    Nalor kitei ki jingthoh, ka Pomktien (Crossword) ka dei ka wei ka bynta kaba don ïa ka jinglong bakham kyrpang (uniqueness) jong ka ha kaba ka la long ym ka jingpynbyrngia kumba long kiwei ki pomktien, hynrei ka long kaba ïarap ïa ki para Samla bad ki dkhot jong ka balang ba kin smat ban pule ïa ka Ktien U Blei. Ka jingdon jong ka Crossword ka pynlong ban ktik ïa ka jingmut jong kito kiba ïaleh ban jubab ïa ka ba kin nang wad kham bnïah ïa ka Ktien ka jong U Blei hi.
    Kumta, ha kine ki shiphew snem jong ka jingïaid lynti jong ka, ka Newsletter Lam Jingshai ka la noh ïa la u jong u synnïang u jong ka ha kaba ïadei bad kaba kyntirew ïa ka pyrkhat pyrdaiñ Khristan jong ki para samla bad kiwei pat ki dkhot jong ka balang lyngba ki jingthoh kiba pher bapher na ki khun samla bad ki dkhot jong ka Jingïaseng Samla bad ka balang hi.
    Ka jingkyrmen bad ka jingduwai ka long ba U Blei hi Un nang ïai ai bor ïa ka Jingïaseng Samla ha ka jingpyrshang jong ka ban tei ïa ka pyrkhat pyrdaiñ Khristan lyngba ka Newsletter Lam Jingshai katba ki sngi ki nang ïaid. Kumta, kum ka Jingïaseng Samla, to ngin long kiba don ïa ka jingshemphang bakynja mynsiem bad kiba leh ruh ïa kaba dei.