LamJingshai Newsletter

       Ka LamJingshai Newsletter jong ka Jingïaseng Samla Balang Presbyterian Jaïaw ka long ka ‘shithi pathai khubor’ ba la ju pynmih ha ka dur jong ka kot lyngkdop ha man la ka ar-bnai (bi-monthly) ha ki snem kiba la leit. Ka jingthmu jong ka ka long ban sam lem ïa ka khubor ka jong U Blei lyngba ka Ktien jong U da ki jingthoh ki ban long ki jingbam ki ban ïarap ban pynsan ïa ka jingim bakynja-mynsiem jong ki parabangeit bad ki nongpule baroh. Ka long ruh ka lad jingïasyllok ïa kito kiba donkam ïa ka jingai-mynsiem; bad ka long ruh kum ka lad pathai jingtip ïa ki jingjia bapher-bapher kiba ïadei bad ka jingngeit Khristan satlak ka pyrthei. Ka jingduwai jong ka Jingïaseng Samla ka long ba U Blei Un kyrkhu ïa baroh kito kiba ïoh ban pule ïa ka.
       Na ki daw jong ka pandemic ym shym la ïoh shuh ban pynmih ïa ka namar ki jingeh ha ka leit ka wan bad ka rah ka rong, bad kumta la dei ban pynsahteng noh ïa ka. Hynrei ainguh ïa U Blei ba U la plie pat da kane kawei ka lad ban pynïaid biang ïa kane ka shithi pathai khubor ha ka dur jong ka e-newsletter, kaba long ka lad kaba bha tam ha kine ki sngi ban lah ban pynsaphriang ïa ka wat shaba kut ka pyrthei. Ngi ngeit skhem ba U Blei Un kyrkhu ïa kane ka jingpyrshang kaba thymmai; na ka bynta ka burom jong U, Amen.